Maayong adlaw mga bisaya ! Kumusta namo diha ? 

Hapit na pud semana santa ug init na pud kaayo diha sa ato ! Uso na pud ning mga halo-halo, ice candy, ice buko nga sinuroy ug ang pinakasikat nga ice cream nga tudtud. Nahinumdom nuon ko sa akong amahan nga manghimo-ay og ice cream ug tabliya kaniadto'ng gamay pa'ko ug akong mga maguwang babay nga mamuwaw og hinimo og ice candy samtang ako ug ang akong maguwang lalaki ray tig kaon sa mga baligya ! 

Diri sa France tingtugnaw pa para sa mga mabugnaw nga pagkaon pero ana-a pud sila'y mga postre (dessert) nga mahimong ikadalit bisan sa panahon nga tingtugnaw. Inandan na sa mga pranses ang mokaon og tam-is ini'g human sa paniudto o panihapon maong daghan sila'g klase-klase nga mga pagkaon nga sa lain-laing pamaagi ang pagpreparar. Parehas sa akong gisulti sa niagi nako'ng resipi sa Crème Brulée nga uso ang pagka-ong pranses sa Pilipinas pero sigurado ko nga dili tanan kanato maka adto og mga restawran labi na katong mga mahalon.
Maong karong adlawa gusto ko i-ambit kaninyo ang akong resipi sa Mousse au Chocolat o Chocolate Mousse. Usa ni sa pinaka ilado nga dessert diri sa France tungod sa kasayon sa paghimo niini ug labaw sa tanan barato ra ang mga sagol kumpara sa imong mapalit sa mga restawran nga sa gamay nga baso pwerti ng mahala.

Sa mga gamiton sa paghimo sa Chocolate Mousse, nagkinahanglan kini og simple'ng spatula nga pangluto, demano nga pangbatil (egg whisker) ug makina nga elektrik (electric mixer) nga gamiton pangbatil sa mga klara sa mga itlog. Kung wala man gani kamo aning matanga sa makina pwedi ra gihapon nga gamitan ninyo aning pangbatil nga demano pero madugay pud hinuon ka sa paghimo og ispuma gikan sa mga klara sa itlog.

Nah hala, pagasugdan na nato kini aron makakaon ta'g sayo ! 

Mga Sagol

• 200 g tsokolate (black baking chocolate)
• 6 ka itlog
• asin

Proseso

1. Dugmoka ang tsokolate ug ibutang kini sa panaksan nga maigo isulod sa kaldirin nga naay tubig (water bath). Inita ang kaldirin ug huwata nga ma anam-anam og katunaw ang tsokolate, ukay-ukaya pud kini panagsa aron malanay og tarung ug malikayan ang pagkapagod niini.
   
   
2. Samtang gapatunaw ka sa tsokolate, pagasugdi og siparar ang mga pughak (egg yolk) ug mga klara (egg white) sa mga itlog. Ibutang sa tagsa-tagsa'ng dagko nga mga panaksan ang mga klara ug mga pughak.
   
   
3. Butangi og duha ka pudyot nga asin ang mga klara ug pagasugdi kini og batil sa makina nga electrik (electric mixer) bali'g 5 ka minutos o hangtud sa mahimo kining gagmay nga mga bula o ispuma (mousse).
   Pahibalo : Para mahibaw-an nimo kung insakto na ba ang pagkahimo sa ispuma, sulayi og hinay-hinay nga ituwad ang maong panaksan. Kung kini nipilit sa panaksan nagpasabot nga maayo ug sakto na ang pagkabatil pero kung nagpabilin pa gani kining tubigon, ipadayon ang pagbatil bali'g 2-3 ka minutos hangtud sa mogahi ang ispuma.
   
   
4. Kung nalanay na og tarung ang tsokolate, ipadaplin una kini aron mabugnaw diyotay. Samtang gapaabot ka sa tsokolate nga mabugnaw, pagasugdi og batil ang mga pughak gamit ang pangbatil nga demano (egg whisker) ug isagol ang tsokolate nga dili na kaayo init. Kutawa kini pag-ayo hangtud sa matarung pagkasagol ang tsokolate ug mga pughak.
   
   
5. Ihuwad ang mga klara nga nahimong ispuma ngadtu sa tsokolate ug mga pughak. Ukay-ukaya kini gamit ang spatula sa pamaagi nga ipa-ibabaw ang ilawm nga bahin pero hinay-hinay lamang aron dili mangabuak ang mga gagmay'ng bula og mahimong tubigon ang mga sagol. Padayon sa pag-ukay hangtud sa matarung ang pagkasagol niini ug ibalhin kini sa mga sudlanan nga inbidwal.
   
   
6. Ibutang kini sa pridyidir bali'g 3-4 ka oras aron mogahi sa dili pa ikadalit.

Nota :
Mahimo pud kining paresan og biskwet. Sa akong litrato gipaibabwan ko kini og saging, whipped cream ug dinugmok nga mga mani nga gikaramel.

1 Comment

• Jelian Rosal said mardi 10 février 2015 20:28:35

  salamat sa imong post sayun rman diay ning chocolate mousse buhaton