Bœuf Bourgignon
Maayong adlaw mga bisdak !
Tingpaniudto na diri ug oras na tinghabhab sa akong mga batus ! Unsay sud-an ninyo diha ? Ani-ay nilat-ang baka nga akong giluto, sukad pa ni ganinang sayo sa buntag nako gitak-ang. 
Hisgot ta'g nilat-ang baka, diri sa France lahi kaayo ni ilang bersyon sa mga sabaw-sabaw dili parehas sa atong estilo nga pinalasaw ug taga li-og ang gidaghanon sa sabaw ! 
Ilaha diri kasagaran pinabaska og sabaw, galing lang bino ang itimbol sa lain-lain nga klase sa karne (baboy, manok, baka, rabbit, ug uban pa). Aduna pud silay lain nga bersyon sa linat-ang baka nga gitawag nila og "Pot au Feu" (ipost nalang nako sa sunod), parehas hapit sa atong estilo nga pinasawm sa tubig pero lahi ra gihapon og lasa sa atong naandan.
Karong adlawa, iambit ko kaninyo ang resipi sa sud-an nga kasagaran lutoon diri sa panahon sa tingtugnaw : Bœuf Bourgignon
Sa tradisyonal nga pagluto sa Bœuf Bourgignon, na andan kini nga lutoon sa puthaw nga kaserola pero para nako mahimo gihapon kini lutoon sa kaldero nga atong gamiton sa pagluto og kan-on. Sa mga nagdali ug way saktong panahon sa pagpaabot sa pagkaluto sa karne, mahimo usab kini lutoon sa pressure cooker aron madali.
Para sa mga sagol nga importante sa pagluto niini, magkinahanglan kini og usa ka botelya nga bino tinto o red wine, mga uhong nga puti ug mga gagmay'ng dahon sa thyme. Dili ko sigurado kung mahikaplagan ba ning matanga sa sagbot nga pangpahumot diha sa atoa pero madala ra gihapon kung wala. Li-og sa baka ang akong gigamit sa pagluto niini pero mahimo usab kini gamitan og ikog, aping o uban pang gahi nga parte sa karne sa baka nga lutoon og dugay pero hinay.
Nah hala, andama na ang mga ipangsagol aron mahuman og makaka-on ta'g sayo !
Mga Sagol
- 1 kg nga karne sa baka
- 200 g nga tiyan sa baboy
- 75 cl nga bino tinto (red wine)
- 300 g nga uhong nga puti
(white mushrooms) - 6 ka karot
- 1 ka sibuyas bombay
- 4 ka lusok sa ahos
- 3 ka dahon sa lawrel
- 1 ka kutsarita nga paminta nga tibuok
- 1 ka sanga sa thyme
- 1 ka kutsara nga mantika sa oliba
- 2 ka kutsara nga harina
- 2 ka tasa nga tubig
- 2 ka beef cubes
- asin
Proseso
- Hiwa-a ang karne sa baka og dinagko nga kubitos. Unya hiwa-hiwaa usab ang karne sa baboy og ginagmay.
- Paniti ug hiwaa ang sibuyas bombay, ahos ug mga karot. Limpyohi ang mga uhong ug hiwaa usab kini.
Pahibalo : Ayaw hugasi ang mga uhong aron dili kini mo absorba og tubig hinungdan nga mawagtang ang lasa niini. Limpyohi lamang kini sa basa nga trapo o tissue paper. - Pagasugdi og init ang kaldero, ibutang ang karne sa baboy ug lutoa kini hangtud sa mogawas ang kaugalingon'g mantika ug motabun-on (brown) diyotay ang kolor sa karne. Hauna kini ug ibutang sa plato, ipadaplin una.
- Padayon sa pag init ang kaldero ug ibutang ang mantika sa oliba. Ipuli og luto ang karne sa baka hangtud sa matabun-on usab ang kolor niini. Hauna ug isagol kini sa karne sa baboy.
- Gisaha ang sibuyas bombay ug ahos sa kaldero bali'g 2-3 ka minutos ug ilunod pagbalik ang mga karne kauban sa mga uhon ug mga karot. Sugkay-sugkaya bali'g 3 ka minutos.
- Itimbol ang bino ug tubig unya isagol ang mga dahon sa lawrel, mga paminta, ang sanga sa thyme ug ang 2 ka beef cubes. Tabuni kini ug huwata nga maluto og hinay-hinay bali'g 3 ka oras. Pagatan-aw tan-awa kini, timboli og tubig kung nahubsan aron dili mopilit ug mapagod.
Pahibalo : Kung nag gamit kamo og pressure cooker, lutoa lamang kini bali'g 1 ug tunga sa oras. - Makalabay ang maong oras, lantawa kini kung luto ug humok na ba kaayo ang karne.
- Sagoli ang 2 ka kutsarang harina og diyotay nga tubig igo lang aron matunaw ug isagol dayon kini sa karne samtang hinay-hinay ang pagsugkay. Lutoa og balik bali'g 5 ka minutos. Timplahi og asin ug paminta depende sa imong lasa ug unya mahimo na kini ikadalit. Manga-on na'ta !
Nota :
Ipares kini sa init nga humay o pasta pero lami usab kini ibahog sa semolina o mais # 14.