Maayong adlaw mga higala !

Kumusta namo diha ? Katapusan'g adlaw na sa semana ug panahon na usab nga mamahuway kita. Unsay plano ninyo mata'g sabado ug dominggo ? Kami, kontento lamang nga naa ra sa balay unya maghikay og mga pagkaon nga dili namo makaon kada adlaw tungod sa oras o budget ! 

Karong adlawa, buot ko iambit kaninyo akong resipi sa akong bersyon sa Sisig. Dugay ko na unta gustong magluto og mga binugoy nga kaon diri apan lisud lamang mahikaplagan ang mga sagol nga pangsubak parehas niining ulo ug dugo sa baboy maayo na lamang kay naa mi na ila-ila nga mangingihaw dili lang dugay ug sayon nalang namo pagpalit ning mga klaseha sa karne. Dinhi sa France lisud kaayo ni makit-an sa mga tindahan kining mga matanga kay kasagaran luto na daan ang ilang mga baligya.

Ang mga pranses mokaon usab niining mga klaseha sa karne : ulo sa baboy o baka, dugo sa baboy, tina-e, kasing-kasing, atay ug uban pa nga mga parte sa karne nga kasagaran walay mamalit !  Lain-lain usab ilang pamaagi sa pagpreparar parehas sa ulo sa baboy, ilahang bersyon niini kay gitawag nila og "Fromage de Tête".
Wala kaayo'y kalahian sa pamaagi nato sa pagpabukal sa karne apan sa pagkaon niini paresan lamang og pan silbi mura'g palaman. 

Tuod diay, gigamitan ko lamang kini og tunga sa ulo sa baboy kay mao may akong nahikaplagan sa tindahan. Ang tunga sa ulo mokabat og 1 ka kilo kapin ang gidaghanon kung mahagpatan na kini maong pagkahuman nako og hiwa-hiwa sa karne, 350 g ra akong gigamit ug ang salin akong gifrozen aron mapreserba og dugay (2 ka buwan ang kinadugayan para nako).

Nah hala, pagasugdan na nato kini og preparar kay dugay-dugay pud ra ba ni mahuman !  

  Mga Sagol

• tunga nga ulo sa baboy
• 50 ml nga suka
• 1 ka kutsara nga mantika
• 2 ka kutsara nga asin
• 1 ka kutsarita nga tibuok nga paminta
• 1 ka kutsarita nga ginaling nga paminta
• 3 ka dahon sa lawrel
• 1 o 2 ka sili espada
• 1 ka pulgada nga luy-a
• 1 ka sibuyas bombay nga dako
• 2 ka lusok nga ahos
• 1 ka itlog
• tubig

Proseso

1. Hugasi og limpyohi ang ulo sa baboy ug isulod kini sa dako nga kaldero. Timboli kini og tubig hangtud sa matabunan ang karne.
   
   
2. Isagol ang suka, ahos nga gidugmok, mga dahon sa lawrel, mga paminta nga tibuok ug usa ka kutsara nga asin. Pabukali kini bali'g 1 ug tunga sa oras o hangtud sa mohumok ang karne.
   
   
3. Haona ang karne ug huwata nga mabugnaw.
   
   
4. Isagol ang ginaling nga paminta ug usa ka kutsara nga asin. Pahiri og mantika ang karne ug bagnusi kini sa sagol nga asin ug paminta.
   
   
5. Painita ang pugon sa temperatura nga 225 C° ug hurnoha ang karne bali'g 15 minutos o hangtud sa motabun-on (mo brown) ang kolor ug mokagubkob pagsugod ang panit.
   Pahibalo : Kung wala kamo niining pugon, mahimo ra usab kini isugba sa oling. 
   
   
6. Haona kini ug huwata nga mabugnaw aron sayon na lamang ang paghagpat niini.
   
   
7. Pagasugdi kini og hagpat, hasta ang simod, dila ug dunggan sa baboy pero ayaw iapil ang mata.
   
   
8. Hiwa-hiwaa ang karne og ginagmay. Tagura usab ang sibuyas bombay, luy-a ug mga sili.
   
   
9. Painita ang plato nga puthaw o kaha ug isagol ang hiniwa nga karne (350 g). Lutoa kini hangtud sa mogawas ang kaugalingong mantika niini.
   
   
10. Kuha-i sa nagsobra nga mantika ang karne aron dili kini maglutaw sa tambok. Isagol ang mga lamas nga tinagud ug lutoa kini bali'g 10 minutos samtang padayon ang regular nga pagsugkay.
    
    
11. Paibabwi kini og itlog nga hilaw sa dili pa ikadalit.
    
    
12. Manga-on na 'ta !

No Comments