Maayong adlaw mga higala ! Sigurado ko daghan kaninyo ang nagtagbaw og kaon kagahapon sa pistang sugbuanon. Karong adlawa palahi usa ta sa karne, paubos usa 'ta sa atong hayblad buhat sa sige'g kaon og letchon, dugo-dugo, humba ug uban pang mga salin sa pista !  

Ani-ay simple nga resipi nga akong ikadalit kaninyo, Inun-onang Anduhaw. Nindot ni subakan og paliya, tawong ug okra pero nihit man ni mahikaplagan sa amoang dapit ang paliya ug okra maong magmantinil nalang usa ko aning bersyon nako nga dinali-dali. Lami kaayo ni ibahog sa mais numero 14 pero wala may uso bugas mais diri, pabahaw-bahaw lang usa 'ta ron. 

Nah hala, pagasugdan na nato kini og luto kay gahinam-hinam nako mokaon nga magkinamot niining matanga sa kaon dah !

Mga Sagol 

• 2 ka buok nga isda'ng anduhaw
• 1 ka sibuyas bombay
• 3 ka lusok sa ahos
• 1 ka pulgada nga luy-a
• 2 ka sili-espada
• 50 ml nga suka
• 1 ka tasa nga tubig
• 2 ka dahon sa lawrel
• 6 ka nga tibuok nga paminta
• 1 ka kutsarita nga asin

Proseso

1. Limpyohi ang mga isda og kuha-i kini sa ilang mga hasang. Hiwa-a og makaduha o hangtud sa makatulo depende sa gidak-on sa maong isda.
2. Balibori ang mga isda ug usa ka kutsarita nga asin. Han-aya kini sulod sa kaldirin o kung ana-a kamoy kon mas labing maayo kung mao kini imong gamiton.
3. Hiwa-a ang sibuyas bombay ug dugmoka ang mga ahos, paminta ug luy-a. Iapil kini og han-ay kauban sa mga hiniwa nga isda, sili-espada ug dahon sa lawrel.
4. Isagol ang suka og tubig. Itak-ang ug huwata nga mobukal, luto-a bali'g 10-15 ka minutos.
5. Tilawi kung sakto ba sa iyang lasa ug kung aslum o parat ra kaayo, dugangi kini diyotay og tubig ug pabukala og balik.
6. Haona ang kaldirin o kon ug pwedi na kini idulot sa lamesa.

No Comments