Crêpe Sucrée (Sweet Crêpe)
Maayong adlaw mga bisdak !
Kumusta namong tanan diha ? Unsay meryenda ninyo diha ron ? Lami kaayo ikaon og saging tinuhog, puto, binangkal ug uban pang lami-ang mga meryenda nga binisaya. 
Karong adlawa magluto ta ninyo og "Crêpe", hotcake nga bersyon sa mga Pranses. Wala gihapon kini kalainan sa hotcake nga mahikaplagan nato sa eskina apan gamay lang ang magamit nga mantika sa pagluto niini.
Nagkinahanglan diay pud kini og mga ilimnon nga sa atoa pa "pangpamaoy" ! 
Sagolan kini nato og Apple Cider kung mahikaplagan man kini diha sa atoa pero kung wala pwedi ra gihapon ilisan og beer unya rhum usab para pangpahumot.
Ayaw mo kalabaka mga migo, mga miga kay bisa'g usa pa ka bandihado inyong mahurot di jud mo mangahubog niini kay mawagtang naman ang alkohol inig kaluto pero moburot lang imong tiyan og kinaon ! Gamitan usab nato kini og pangbatil nga demano (egg whisker).
Nah hala, andama na diha daan ang atong mga gamitonon aron madali ta 'rong adlawa !
Mga Sagol
- 350 g nga harina
- 4 ka itlog
- 1/2 sa litro nga presko'ng gatas
- 25 cl nga apple cider o light beer
- 2 ka kutsara nga mantika
- 2 ka kutsara nga rhum
- asin
Proseso 
- Ibutang ang harina sa dako nga panaksan og sagoli kini og duha ka pudyot nga asin.
- Pagbuhat og buho sa tunga niini ug itagsa-tagsa pagsagol ang mga itlog, timboli kini og gatas nga presko aron mahinay-hinay og ka sagol ang harina. Kutawa kini hangtud sa matunaw ang mga nagtibugol nga harina.
- Isagol ang mantika ug rhum samtang padayon ang pagkutaw niini.
- Itimbol ang cider/beer sa kataposan, kutawa og hinay ug ibutang kini sa pridyidir bali'g 1-2 ka oras.
- Makalabay ang mga oras, pagasugdi og init ang kaha ug pahiri kini og mantika gamit ang paper towel. Huwata nga moinit pag-ayo ang kaha unya huwari kini og usa ka luwag nga sagol, pataga og tarung aron nipis ug dili kaayo bus-ok ang maong crêpe. Luto-a bali'g 2 ka minutos o hangtud sa mokolor na ang isig ka kilid. Ibutang sa plato ug tabuni kini og alluminum samtang padayon ang pagluto sa uban hangtud mahurot ang maong sagol.
- Pwedi na kini ikadalit diha-diha dayon.
Mahimo usab kining butangan og palaman (melted black chocolate, nutella, whipped cream, fruit jam, ug uban pa). Tara, manga-on nata !
Pahibalo :
Kung dili mahurot og luto ang maong sagol, isulod dayon kini sa pridyidir ug luto-a sa sunod adlaw. Timboli lamang og bali'g usa o duha ka luwag nga presko'ng gatas aron dili mobaska pag ayo. Sa akong litrato, giparesan ko kini og sorbetes, mga mansanas nga akong gikaramel ug akong hinimo nga salted caramel sauce.
