Maayong adlaw mga higala !

Lami kaayo ikaon og tam-is ron uy pero wala man koy higayon mokaon sa gawas buhat niining pagkabisi nako sa pagka-inahan. Sabagay, mas pili-on ko hinuon ang magluto para sa akong kaugalingon ug sa akong pamilya kaysa mokaon sa gawas, makasigurado na sa mga gipangsagol ug makatipid pa jud ko.
Namatikdan ko nga sa atoa sa Pilipinas uso karon ang mga pagkaon nga Pranses (French) ug mga mahal pa kaayo kini sa mga restaurant.

Karong adlawa gusto ko i-ambit ka ninyo ang usa sa pinaka klasik nga postre (dessert) sa France nga akong una'ng nahikat-unan, ang Crème Brulée. Sayon himoon ug barato ra kini sa bulsa, nagkinahanglan lamang kini og mga sagol nga sayon ra mahikaplagan sa atoa gawas niining Banilya ug presko'ng krima nga labiyaw (fresh liquid cream), mura'g talagsa-on ning mga matanga diha.

Kinahanglan usab kini luto-on sa pugon (oven) ug soplete (blowtorch) para sa pagluto sa karamel niini. Kung wala man gani kamoy soplete pwedi ra gihapon hurnohon og balik ang hulmahan sulod sa pugon nga gipaiinit og 250 C° bali'g 3-5 ka minutos, pagatan-aw tan-awa lamang kini kay basi'g mapagod unya !
Nah hala, pagasugdan na nato kini aron mahuman 'ta 'rong adlawa !

Mga Sagol

• 4 ka mga pughak sa itlog
• 120 ml nga presko nga gatas
• 350 ml nga presko'ng krima nga labiyaw (fresh liquid cream)
• 50 g nga asukar nga puti
• 50 g nga asukar nga tabonon (brown sugar)
• 1 ka banilya (vanilla pod)

Proseso

1. Pikasa ang banilya ug kuha-i kini sa iyang mga lugas.
   
   
2. Inita og hinay-hinay ang presko nga gatas (ayaw pabukala) sa kaldirin ug isagol ang mga lugas sa banilya ug kutaw-kutawa kini og hinay.
   
   
3. Samtang gainit ka sa gatas, ibuwag ang mga pughak sa itlog ug ibutang kini sa dakong panaksan.
   
   
4. Isagol ang asukar nga puti ngadtu sa mga pughak ug kutawa kini hangtud sa mo baska ang tekstura niini.
   
   
5. Itimbol ang krima ngadtu sa sagol nga mga pughak ug kutawa kini og tarung.
   
   
6. Palunga ang ininit nga gatas ug itimbol kini og hinay-hinay ngadtu sa mga sinagol nga mga pughak, asukar ug krima samtang padayon ang pagkutaw niini.
   
   
7. Ipabugnaw ang mga sinagol bali'g 1-2 ka oras.
   
   
8. Painita ang pugon ngadtu sa 110 C° ug isulod ang dakong hulmahan nga gisudlan og bali'g usa ka pulgada nga tubig (water bath).
   
   
9. Ibalhin ang mga sinagol ngadtu sa mga gagmay nga hulmahan nga indibidwal ug ibutang kini sulod sa dakong hulmahan nga naay tubig sulod sa pugon. Hurnoha kini sulod sa 1 ka oras, dugangi og tubig ang dakong hurnohan aron padayon nga mahinay-hinay og ka luto ang mga sagol ug malikayan ang pagkapagod niini.
   
   
10. Kung sulod sa 1 ka oras og nagpabilin pa gihapon nga tubigon ang maong sagol, padayona kini sa paghurno bali'g 10-15 ka minutos.
    
    
11. Haona kini ug pabugnawa bali'g 45-60 ka minutos. 
    
    
12. Andama ug dagkoti ang soplete. Butangi og usa ka kutsara nga asukar nga tabonon ang tagsa-tagsa ka mga gagmay nga sudlanan ug pagasugdi og luto ang asukar hangtud sa mogahi kini diyotay ug mahimo na kini ikadalit. Manga-on na 'ta !

Nota :
Para sa mas lami-an nga crème brulée, ipabugnaw una kini sa pridyidir bali'g 2-3 ka oras. Luto-a lamang ang karamel niini sa kataposan sa dili pa kini idalit.

No Comments